Vourstellt en Haus Moggioli der projekt Euregio “De bèlt van jungen zbischen bècksln, naiekaitn ont moglechkaitn”
S hom toalganommen de provinzaln asesorn Achille Spinelli ont de auskenneta techniker va de untersuach
Zbischn òndra, hom toalganommen der viarer van Dipartiment u’lear ont kultur va de PAT Roberto Ceccato, de schualiberschauer Viviana Sbardella ont de iberòll viarer va de òrbetagenzi Stefania Terlizzi.
Der projekt vourstellt as de 31 van genner, no a suach as drinnnimmp ungefèr zbelf tausnt jungen, kimmp unterstizt van a partnership zbischn der Euregio ont a toal toalnemmer van drai lander. Ver en Trentin: der Lear ont Kultur Dipartiment va de PAT, der Psichologische ont Bisschòft Kennen Dipartiment va de Universitet va Trea’t, IPRASE ont de òrbetagenzi; ver de autonome Provinz va Poazn der u’lear professional omt van Land Tirol ont der òrbet ont Schòft Dipartiment.
“S bichteste ver de jungen barts sai’ sèll za meing hom a richtega òllgamoa’ u’lear ont rècht no stea’ en de bècksln, s doi ist kemmen tsòk bail der trèff van òllgamoa’ òrbetstòtt aa ” hòt er tsòk der asesor Spinelli. “De doin momentn va bècksl sai’ runt bichte en lem va de schual ober gor ver de òrbet, pet de vrong as men hòt benn as men tschèrlt sèll as men bart tea’ en de zait as kimmp, òlla de tschèrln va benn as men ist en de zboate schual va earste grat finz en de universitet sai’ runt bichte.
S lem leik vour en de lait mearer tschèrln ont de òllgamoa’innrichtn miasn meing gem ont regiarn dei doi momentn va bècksl, ver dòs miast men hom lait as bissn gor de neat van bèrkn, as meing song bos za learnen ont bos as ist pèsser tea’.
De bèlt va de òrbet billt junga paroat ont galeart en de òrbet as de hom tschèrlt ont s doi teaber versichern en a schual as paroatet ver òlbe. Ver dòs der sistem van Trentin hòt enviretrong ont tuat unterstitzn an be ver za tschèrln, gor pet an òrbet zbischn de schual, de schual ver de òrbet ont de òrbet”, hòt er tsòk de asesor Spinelli.
Ibearearstn de iberòll sakretare van Euregio Marilena Defrancesco hòt tsòk abia bichte as sai’ de zòmmriaf ver de lait as regiarn de zait va bècksl van jungen, ont hòt unterstitzt as der Euregio Tirolo-Südtirol Trentin, finz va benn as der ist augòngen en 2011, hòt galeik de jungen en de mitt van sai’na projektn ont bail de Trentinisce presidenz 2021-2023, as schraip “Der Euregio ist jung”.
Sbaredella ont Ceccato hom klòfft iberhaup van prozess ver za tschèrln va benn as men ist kloa’ finz as men bòckst, as ist ònderst en an iata èltekait ont en de bècksl as kimmp tsechen: bail de zait as men nou kinn ist ont vour de zait as men jung ist tuat men òcht gem en de aigene bòckzait ont en de identitet van kinn-student. Derno va de jung zait, derno as men hòt tschèrlt de schual no de zboate schual va earste grad, tuat men schaung gor bos as men ist brafer za learnen, gor unterstitzt va de schual ont van òlla de lait as mòchen toal van doi prozess. Der Trentin trok envire vil naiekaitn ont naia òrbetn ver za kennen tschèrln: zan paispil s hòt Trentino Orienta ont der portal Vivoscuola, ont nou der portfolio as gip a hilf en sèll as men tea’ bill en lem. Nèt minder bichte ist nou sèll as tuat de IPRASE ver za paroatn de learer ont ver za gem en a hònt asou as de meing pesser verstea’ sèll as de jungen kennen pesser tea’.
