Studentn va de Hoa Pildung en pasuach ka der bersntoler gamoa’schòft

[Mòcheno] En ma’ta sai’ kemmen en pasuach ka der bersntoler gamoa’schòft de Studentn va de Hoa Pildung va der ENAIP va Villazzan. Der to, as klòfft hòt van bersntoler heff, hòt se austoalt en zboa momentn.
Zan earst hom se se pfuntn en de gamoa’sol va Palai. De studentn hom derbischt en gruas va de Gamoa’ ont darno der Leo Toller van Kulturinstitut hòt en kontart abia as augòngen ist der hoffsistem do en Bersntol ont dòra de Elisa Iachelini hòt zoakt de untersuach as de tradizionaletn haiser van pèrg as se enviretrong hòt.
Dòra sai’sa gòngen za schaung an ettlena haiser ont heff en Palai. De studentn, pet de Elisa Iachelini ont en Cesare Benedetti, tutorn van kurs, sai’ gòngen kan Jorger ont kan Batister, ont dòra gor anau finz kan an ettlena summerstelder kan Jorgereck ont kan Scheller.

Der trèff en de heach van Bersntol hòt gem en de studentn de moglichkett za kennen pesser pet bos ont abia as de hom augamòcht de haiser ont de stelder a vòrt do en inger tol.
De arkitektur ont de lòntschòft van tol trong gabiss nou hait en druck van òrbetn en de heff, en de boa’n ont en de balder as gamòcht sai’ kemmen van pauern ver jarder, gor mens iaz, en de leistn jarder, de lòntschòft ist runt gami’t ont bavai de doin òrbetn sai’ runt zaruck gòngen.
Der pasuach van studentn mòcht toal van projekt “De kròft va de sprochminderhait: s bider augea' van a taitsches dorf en sud van Alpn”, Toal nr. 29, projekt “Gem bider bèrt en de òltn paun ont en de lòntschòft van Alpn: kennen òrbetn pet stoa’ ont holz”, gamòcht va TSM|Step Schual ver de Regiar van Grunt ont van Lònt en zòmmòrbet pet de ENAIP, der Noschauger en de trentinische Lòntschòft, der Nationalpark van Stelvio ont s Bersntoler Kulturinstitut.