Kennen de bersntoler gamoa’schòft, garift de aktivitet van schualer va de schual “Andreatta” va Persn

[Mòcheno] Ver za kennen se pesser en de schual ont abia gamoa’schòftn ont ver za kennen der territorium as nèt asou vèrr steat, de Zboateschual va earste grad “C. Andreatta” va Persn as aunimmt aa de schualer as kemmen van gònze Tol ont alura van bersntoler derver aa, hòt u’ganommen za nemmen toal en de iniziatif as vortgòngen ist en zboate toal va leistagest ont as garo’ garift ist pet de viarung van mitòrbeter van Bersntoler Kulturinstitut ont va de Gamoa’ va Palai en Bersntol.
Ver za kennen de gschicht- sproch- ont umbèlt- aspektn va de bersntoler gamoa’schòft, de laischiar 300 schualer va de zboateschual va Persn hom verpringt an to en Tol pet an programm as ist ònderst gaben noch de klasse van schualer.

Der programm ist noch gòngen en de drai heftler “Do glaim en Bersntol” as gamòcht ist kemmen pròpe ver de schualer. De earstn klassen hom gahòp za tea’ as de sidlung va de gamoa’schòft en Mitteròlter, as de òrbetn van pauern van a vòrt ont mear as ònderst as en bòlt ont as en prauch van mearern schòrtn va holz, zòmmpuntn pet en pasuach va de Sog van Rindel. De zboatn klassen hom gaòrbetet pet a toal bichtega elementn va linguistik, abia de sèlln va mearsprochigkait, sprochminderhait ont toponomastik. Derno hom sa kennt pasuachen en Filzerhof ont kennen òndra aspektn van lem van òll to van familie ont va de gamoa’schòft. De drittn klassen hom vertiavert zboa òndra bichtega aspektn va de gschicht ont van lem van bersntoler derver: s hausiarn van krumer as se embiart hòt en de leistn zaitn van Tausntsimhundert ont de òrbetn en de gruam as en Tol a gschicht va mear as 600 jor hom. Ver en doi aspekt, hom se kennt pasuachen s Pèrkmandlhaus, s kloa’ museum as de mineraln, ont de Gruab va Hardimbl, de gruab van mitteròlter as se vinnt ka Hardimbl, af 1700 meter iber en meir ont as men kònn pasuachen pet kloa’na gruppn ont pet de schualn.

Ibersetz van Bersntoler Kulturinstitut