[Mòcheno] De òltn gschichtn sai’ eppas noatbende ver za kennen a lònt, zòmm pet de untersuach van sòchen ont van dinger ver za verstea’ pesser s raich van pèrglònt. As de doin temen bart se hòltn an auspildungkurs en sònsta as de 27 van oberel en Gamoa’sol va Palai en Bersntol. De iniziatif ist organisiart van Bersntoler Kulturinstitut zòmm pet de Gamoa' va Palai en Bersntol ont mòcht toal van projekt pet de gèlder van PNRR “De kròft va de sprochminderhait: s bider augea' van a taitsches dorf en sud van Alpn”, mos nr. 4: Seminarn, trèffn, mittoal iniziativn as de sprochminderhait”.

Vormitto bart men gem de elementn ver za kennen studiarn de gschichtn as de Alpn, pet de sai’nen bichtegestn toaln ont ausdrick vinz za riven ka de òrbet va untersuach as en Bersntol as gamòcht hòt der Giuseppe Šebesta. Nomitto bart men klòffen van temen as haitzegento trèffen de etnografischn museen, zòmm pet òndra toaln van kulturpahòlt. Za riven bart men klòffen va abia as de sòchen, de paun ont plinder, as derstelln de sèll as gahoasn kimmp ‛zaig- kultur’, kennen kemmen bichte ver za meing pakonnt gem de gschicht van eirter, nèt lai durch de musealisiarung, ober zan paispil durch s zòmmklaum van sòmmler as kònn gem an nain sinn en de sòchen ont za studiarn en drau en de antropologi.

Programm
9.30: Grias ont innviar en kurs
9.45  De gschichtn van a vòrt: schòrtn, strukturn ont bos as sa song belln - Daniela Perco; Giuseppe Šebesta ont de òltn- bersntoler- gschichtn - Claudia Marchesoni
12.30 - Vormes
14.00: Gamischta museen ver a nais zòmmpintn va mentsch ont ourt - Elisa Bellato; De stimm van sòchen: gschichtn van etnografischn dinger - Filippo Broll
17.30: Pasuach va de ausstell “Klòffen, sprechen, parlare. Durch s bersntolerisch” en sitz van Bersntoler Kulturinstitut.

De toalnemm ist umansist, vrai ver òlla ont derkennt abia auspildungkurs ver de learer. Men mias se lai innschraim vour as de 25 van oberel en doi link:  https://www.bersntol.it/L-istituto/Novita/Corso-di-formazione-Auspildungkurs-27-aprile-2024#page-content