Comunicato stampa
-
Pubblicato il
Venerdì, 08 Marzo 2024
-
Modificato il
Venerdì, 08 Marzo 2024
[Ladino] Da la colaborazion percacenta anter Servijes linguistics, de museo e de la biblioteca de la Majon di Fascegn, la Scola Ladina de Fascia e l Comun general de Fascia l é nasciù l domarena de formazion per ensegnanc stat ai 6 de mèrz aló da la sala Heilmann del Museo Ladin de Sèn Jan.
La scomenzadiva la é stata pissèda per enjignèr la scoles a zelebrèr l’Aisciuda Ladina, festival del lengaz e de l’identità, endrezà vigni an entorn ai 5 de mé, dì olache vegn recordà la unità di ladins del Sela e canche del 1920 l é stat metù fora la pruma outa sun Jouf de Frea la bandiera ladina dai 3 colores: vert desche i pre e i bosć, bianch desche la neif e brun desche l ciel.
I ensegnanc à lurà al endrez de unitèdes didatiches per descorir i inomes de lech de Fascia, col obietif de arvejinèr i bec a l’identità ladina, soscedan sia curiosità e sia fantasia, magari ence col proèr a ge dèr inomes neves ai posć olache i vif, col durèr la medema modalitèdes de chi che tel passà ge à dat inom ai lesc aldò del besegn, de sia vijion e de sia intuizions.
Na vida gustegola e fosc neva de comunichèr cultura e lengaz e de fèr acioche ence la neva generazions abie na maor consaputa de cotant che l lengaz ladin posse dir fora e contèr l passà e l teritorie a na vida alternativa e da marevea.
